Rezyume yozish: dasturchi uchun amaliy qo'llanma

Rezyume — sizni ishga olmaydi. Uning yagona vazifasi suhbatga chaqirtirish. Shu maqsaddan kelib chiqib yozilishi kerak.

Bir sahifa

Junior uchun ikki sahifa ko'p. Ish beruvchi birinchi ko'rishda 10 soniya sarflaydi — shu vaqtda eng muhim narsa ko'rinishi kerak.

Tartib

1. Ism, kasb, aloqa — bir qator. Telefon, pochta, GitHub, portfolio havolasi.
2. Loyihalar — junior uchun eng yuqorida turishi kerak.
3. Texnologiyalar — ro'yxat, darajalar bilan.
4. Tajriba — bo'lsa. Boshqa sohadagi tajriba ham yoziladi.
5. Ta'lim va kurslar — oxirida.

Loyihani qanday yozish kerak

Har biri uchun to'rt qator:

• Nomi va bir jumlalik tavsifi
• Texnologiyalar
• Siz aniq nima qildingiz
• Ishlaydigan havola va kod havolasi

Havolalar ishlashini tekshiring. Ochilmaydigan havola loyiha yo'qligidan yomonroq.

Nimani olib tashlash kerak

• "Mas'uliyatli, mehnatsevar, tez o'rganaman" — buni hamma yozadi, hech narsa anglatmaydi.
• Maktab bitirgan yili va bahoingiz.
• Kasbga aloqasi yo'q qiziqishlar ro'yxati.
• Rasm — ko'p kompaniyalarda talab qilinmaydi va joy egallaydi.
• Texnologiyalar bo'yicha "ko'nikma darajasi" diagrammalari — ular sub'ektiv va ishonarli emas.

Texnologiyalarni rost yozing

Bir marta ko'rgan texnologiyani ro'yxatga qo'shmang. Suhbatda undan so'raladi va bilmaslik butun rezyumega shubha soladi.

To'g'ri yondashuv: "ishlatganman" va "tanishman" ni ajrating.

Har bir vakansiyaga moslang

Bitta rezyume hamma joyga yuborilsa, u hech qayerga to'g'ri kelmaydi. Kamida loyihalar tartibini va texnologiyalar ro'yxatini vakansiyaga qarab o'zgartiring — bu 5 daqiqalik ish va u javob ehtimolini sezilarli oshiradi.

Fayl formati

PDF. Nomi: Ism_Familiya_Frontend.pdf. "resume_final_2.docx" nomli fayl professional taassurot qoldirmaydi.